வல்வெட்டித்துறையில் ஆழிக்குமரன் நீச்சல் தடாகத்தை திறந்துவைத்து அமைச்சர் மங்கள சமரவீர

காங்கேசன்துறை துறைமுகம் 45 மில்லியன் ரூபா செலவில் அபிவிருத்தி செய்யப்படவுள்ள நிலையில் இந்து சமுத்திரத்தில் இது இந்தியாவுக்கான நுழைவாயிலாக இருக்க வேண்டும் என அமைச்சர் மங்கள சமரவீர தெரிவித்தார்.

கொழும்பு துறைமுகம் காரணமாக கொழும்பு நகரும், கட்டுநாயக்க விமான நிலையம் காரணமாக கம்பாஹா மாவட்டமும் முன்னேறியதைப் போலவே இந்த இணைப்பு நடவடிக்கைகள் வடக்குக்கு பெரிய ஊக்கமாக இருக்கும் எனவும் அமைச்சர் குறிப்பிட்டார்.

யாழ்ப்பாணத்துக்கு நேற்று வருகைதந்த அமைச்சர் மங்கள சமரவீர வல்வெட்டித்துறையில் 10 கோடி ரூபா செலவில் அமைக்கப்பட்ட ஆழிக்குமரன் நினைவு நீச்சல் தடாகத்தை திறந்து வைத்து உரையாற்றும் போதே அவர் இவ்வாறு கூறினார்.

இங்கு அவர் மேலும் உரையாற்றுகையில்,

பொருளாதாரத்தில் இந்தியா துரித வளர்ச்சியடைந்துள்ளது. இந்தியாவுடன் நாங்கள் தொடர்புகளை ஏற்படுத்திகொள்ள வேண்டும்.

இந்திய உதவியுடன் பாலாலி விமான நிலையம் அபிவிருத்தி செய்யப்படுகிறது. 45 மில்லியன் ரூபா செலவில் காங்கேசன் துறைமுகம் அபிவிருத்தி செய்யப்படவுள்ளது. இந்து சமுத்திரத்தில் இது இந்தியாவிற்கான நுழைவாயிலாகவும் மாற வேண்டும்.

காணாமல் போனவர்களின் அலுவலகம், இழப்பீட்டு அலுவலகம் மற்றும் பிற நல்லிணக்க முயற்சிகள் குறித்து நான் விரிவாகக் கூற மாட்டேன். நிறைய செய்யப்பட்டுள்ளது.வடக்கு மாகாணம் தொடர்பாக அரசாங்கத்தின் பொருளாதார முயற்சிகளின் முன்னேற்றம் குறித்து பேசவேண்டும்.

முதலாவதாக கொள்ளையடிக்கும் கடன்களை நாங்கள் திறம்பட கையாள்கிறோம். இது குறிப்பாக போரினால் பாதிக்கப்பட்ட பகுதிகளை பாதித்தது. மத்திய வங்கி வட்டி விகிதங்களில் 35 சதவீத தொகையை வைத்தது. நுண்நிதி கடன் பொறிகளில் சிக்கிய 45,000 பெண்களுக்கு 1.4 பில்லியன் ரூபாய் கடன் நிவாரணத்தையும் வழங்கியுள்ளோம்.

இரண்டாவதாக நாங்கள் வடக்கிலும் தொழில்துறையை வளர்த்து வருகிறோம். கடந்த பட்ஜெட்டில் எண்ணெய் பதப்படுத்துதல், பேக்கரி பழச்சாறு உற்பத்தி, உரம் மற்றும் உலர் மீன் தொழில்கள் உள்ளிட்ட ஐம்பது கூட்டுறவு தொழில்களின் வளர்ச்சிக்கு நாங்கள் நிதியளித்தோம்.

மூன்றாவதாக நாங்கள் நீண்ட கால நிலையான வளர்ச்சியில் கவனம் செலுத்துகிறோம். மத்திய வங்கியுடன் சேர்ந்து அரசாங்கம் வடக்கிற்கான பொருளாதார மேம்பாட்டு கட்டமைப்பை வெளியிட்டது. வடக்கு பொருளாதார பிரச்சினைகள் முறையாக திட்டமிடப்படுவது இதுவே முதல் முறையாகும்.

இத் திட்டங்கள் பலனளிப்பதை உறுதி செய்வதற்காக பட்ஜெட்டில் வாக்குறுதியளிக்கப்பட்ட 2.5 பில்லியன் ரூபாய் நிதிக்கு அமைச்சரவை ஒப்புதல் கிடைத்துள்ளது. கம்பெரலிய திட்டமும் நல்ல வரவேற்பைப் பெற்றுள்ளது.

கரவெட்டி தினகரன் நிருபர்