இலங்கை ஜனாதிபதி பிரதமர் விடுத்த மேதின செய்திகள் கூறுவதென்ன..?

இலங்கையின் உழைக்கும் மக்களுக்கு தனது மரியாதையை தெரிவித்துக் கொள்வதாக ஜனாதிபதி கோட்டாபய ராஜபக்ஷ தெரிவித்துள்ளார்.

சர்வதேச தொழிலாளர் தினத்தை முன்னிட்டு அவர் வெளியிட்டுள்ள வாழ்த்துச் செய்தியில் இவ்வாறு தெரிவித்துள்ளார்.

கொவிட் 19 நோய்த்தொற்றின் காரணமாக நாடு முகம்கொடுத்துள்ள சவால்களுக்கு மத்தியில் பெரும் அர்ப்பணிப்புகளை செய்து வரும் உழைக்கும் மக்களுக்கு எனது கௌரவத்தையும் மரியாதையையும் செலுத்துவதற்கு இந்த சர்வதேச தொழிலாளர் தினத்தை சந்தர்ப்பமாக ஆக்கிக்கொள்ள விரும்புகின்றேன்.

வரலாறு நெடுகிலும் நாம் முகம் கொடுத்த, வெற்றிகொண்ட சவால்கள் ஏராளம். அந்த அனைத்து சந்தர்ப்பங்களின் போதும் நேரடி பாதிப்புக்கு உள்ளாகின்றவர்களும் முன்னிற்பவர்களும் நாட்டின் உழைக்கும் மக்களாகும். கடந்த காலத்தின் அனைத்து கஷ்டமான சந்தர்ப்பங்களையும் உழைக்கும் மக்களுடன் சேர்ந்து வெற்றிகொண்ட நாம் கொவிட் 19ஐயும் வெற்றிகொள்வோம் என்பது உறுதி.

சர்வதேச தொழிலாளர் தினம் உழைக்கும் மக்களின் ஒற்றுமை, பலம் மற்றும் புரட்சிப் பண்பை உலகுக்கு எடுத்துக்காட்டும் சந்தர்ப்பமாகும். உலகில் இன்று ஏற்பட்டுள்ள நோய்த்தொற்று காரணமாக முழு உலகிலும் உள்ள தொழிலாளர்களுக்கு இம்முறை அந்த வாய்ப்பு அற்றுப்போயுள்ளது. எனினும் மிகவும் சிறந்த, நேரிய சமூகமொன்றை உருவாக்குவதற்கு அவர்களிடமுள்ள திடவுறுதி மாற்றமின்றி தொடர்ந்திருக்கும் என நான் நம்புகின்றேன்.

எமது அரசாங்கம் எத்தகைய கஷ்டமான நிலைமையிலும் கூட நாட்டின் தொழிலாளர்களின் இயல்பு வாழ்க்கையை சீர்குலைத்ததில்லை. அத்தகைய நிலைமைக்கு நாம் இடமளிக்கப் போவதுமில்லை. அவ்வாறே நோய்த்தொற்றை கட்டுப்படுத்தி உற்பத்தி, சேவை துறைகளை இற்றைப்படுத்தி உழைக்கும் மக்களின் வாழ்க்கைக்கான சந்தர்ப்பங்களை பாதுகாக்கவும் நாம் நடவடிக்கை எடுத்துள்ளோம்.

கடந்த வருட மே தினக் கொண்டாட்டங்களுக்கு கொடூர பயங்கரவாத தாக்குதல் காரணமாக கட்டுப்பாடுகள் விதிக்கப்பட்டிருந்தன. நாம் அந்த கொடூர செயற்பாடுகளுக்கு முற்றுப்புள்ளி வைத்தாலும் எதிர்பாராதவிதமாக உலகில் ஏற்பட்டுள்ள நோய்த்தொற்றுக்கு மத்தியிலும் மே தினக் கொண்டாட்டங்கள், ஊர்வலங்கள் இடம்பெறாது. எனினும் நியாயமான உரிமைகளுக்காக செய்யப்படும் போராட்டம் பலப்படுத்தப்பட வேண்டும். இலங்கை தேசத்தையும் நாட்டின் பொருளாதாரத்தையும் புதிதாக கட்டியெழுப்பும் கூட்டு முயற்சிக்கு சர்வதேச தொழிலாளர் தின பிரார்த்தனைகள் பலமாக அமையட்டும்!.

இலங்கையின் உழைக்கும் மக்களுக்கு எனது மரியாதையை தெரிவித்துக் கொள்கின்றேன்.

—–

இதுவரை காலமும் உலகம் அங்கீகரித்த திறந்த பொருளாதாரக் கொள்கையின் ஆற்றலை கோவிட் தொற்று கேள்விக்குட்படுத்தி வருகிறது. அத்துடன் கோவிட்-19 தொற்றுநோய் இலங்கை பின்பற்றி வந்த பொருளாதாரக் கொள்கையிலும் மாற்றம் ஏற்படுத்த வேண்டும் என்ற பாடத்தைக் எமக்கு கற்பித்து வருகிறது என்று பிரதமர் பிரதமர் மஹிந்த ராஜபக்ஷ விடுத்துள்ள மே தின வாழ்த்துச் செய்தியில் தெரிவித்துள்ளார்.

மே தினத்தை முன்னிட்டு பிரதமர் மஹிந்த ராஜபக்ஷ விடுத்துள்ள வாழ்த்துச் செய்தி பின்வருமாறு:

முழு உலகிலுமுள்ள வேலை செய்யும் மக்கள் இம்முறை கோவிட்-19 தொற்றுநோய்க்கு முகங்கொடுத்த நிலையிலேயே உலக தொழிலாளர் தினத்தைக் கொண்டாட வேண்டிய நிலை ஏற்பட்டுள்ளது. எனவே எமது தேசிய சமய வைபவங்களைப் போன்றே சர்வதேச தொழிலாளர் தினத்தையும் வழமையான செயற்பாடுகள் இன்றி கொண்டாட வேண்டியேற்பட்டுள்ளது. தொழிலாளர் மக்களின் பலம், ஒற்றுமையை வெளிப்படுத்தும் வகையிலான ஊர்வலங்கள் மற்றும் கூட்டங்கள் எதுவுமில்லாத நிலையிலும் எமது பலத்தினையும் ஒற்றுமையையும் வெளிப்படுத்துவதற்கான ஒரு வழிமுறை எமக்கு உள்ளது. அது சுகாதார அறிவுறுத்தல்களைப் பின்பற்றி செயற்பட்டு, தொற்றினை ஒழிப்பதற்காகப் போராடுவோருக்கு வேலை செய்யும் மக்களின் துணிச்சலையும் ஒத்துழைப்பையும் வழங்குவதாகும்.

கோவிட்-19 தொற்றுநோய் வேலை செய்யும் மக்களின் எதிர்காலத்தில் பாதிப்புச் செலுத்தும் என்பதை மறைக்க முடியாது. இன்று போன்றதொரு தினத்தில் அந்த சவால்கள் தொடர்பாக வேலை செய்யும் மக்களை விழிப்புணர்வூட்டுவது அந்த சவால்களை வெற்றிக் கொள்ள உதவியாக அமையும். எமது வெளிநாட்டிலுள்ள தொழிலாளர்கள், இலங்கையில் வெளிநாட்டு முதலீடுகளில் இயங்கும் தொழிற்துறை சார்ந்த ஊழியர்கள், சுற்றுலாக் கைத்தொழில் போன்ற கைத்தொழில்களில் ஈடுபடுவோர் என அனைவரும் கோவிட் தொற்றுநோயின் சவாலை எதிர்நோக்கியுள்ளனர். அத்துறைகளில் பணியாற்றும் இலட்சக்கணக்கான வேலை செய்யும் மக்களின் இருப்பைப் பாதுகாக்கும் பொறுப்பு அரசாங்கத்திற்குக் காணப்படுகிறது.

இது வரை காலமும் உலகம் அங்கீகரித்த திறந்த பொருளாதாரக் கொள்கையின் ஆற்றலை கோவிட் தொற்று கேள்விக்குட்படுத்தி வருகிறது. அத்துடன் கோவிட்-19 தொற்றுநோய் இலங்கை பின்பற்றி வந்த பொருளாதாரக் கொள்கையிலும் மாற்றம் ஏற்படுத்த வேண்டும் என்ற பாடத்தைக் எமக்கு கற்பித்து வருகிறது.

எதிர்காலத்தில் ஏற்படும் நிலைமைக்கு முகங்கொடுப்பதற்கான உளப்பலத்துடனேயே இச்சந்தர்ப்பத்தில் நாம் செயற்படுகிறோம். ஒரு மாத காலத்திற்கு மேலாக நாட்டின் பிரதான நகரங்களில் ஊரடங்குச் சட்டம் அமுல்படுத்தப்பட்ட போதிலும், அத்தியாவசிய உணவுப் பொருட்கள், மருந்துகள் உள்ளிட்ட பொருட்களைத் தட்டுப்பாடின்றி பேணிச் செல்கிறோம். 15 இலட்சத்திற்கு மேற்பட்ட அரச சேவை ஊழியர்களுக்கான சம்பளத்தினைத் தொடர்ச்சியாக வழங்குவதுடன், நாளாந்த தொழில்களை மேற்கொள்ள முடியாத எழுபத்தி நான்கு இலட்சம் பேருக்கு வாழ்வாதார நிவாரணம் வழங்கி வருகிறோம்.

அத்துடன், இந்த கடினமான சூழ்நிலையில் வேலை செய்யும் மக்களுடன் தொடர்புபடும் கைத்தொழில்கள் மற்றும் தொழில் முயற்சிகளைப் பாதுகாப்பதற்குத் தேவையான வரிச் சலுகைகளையும் வழங்கியுள்ளோம். வேலை செய்யும் மக்களின் பலத்தினை ஒன்றிணைத்த, உலகின் கொடூரமான தீவிரவாதத்துடன் போராடி வெற்றி பெற்ற நாம் இவ்வாறான பிரச்சினைகளின் போது மண்டியிட மாட்டோம். கடந்த காலத்தின் மீது குற்றஞ் சுமத்தியவாறு புலம்பிக் கொண்டிருக்கும் பழக்கமும் எம்மிடம் இல்லை.

உருவாகும் நிலைமைக்குத் தீர்வாக தனித்துவமான பொருளாதாரக் கொள்கையொன்றைக் கட்டியெழுப்பி தன்னிறைவான பொருளாதாரமொன்று தொடர்பாக அனைவரும் நம்பிக்கை வைக்க வேண்டியுள்ளது. இதுவே கோவிட்-19 தொற்றுநோய் மூலம் நாம் கற்றுக்கொண்ட பாடமாகும். நாம் அன்று முதல் அரச துறைக்குச் சொந்தமான தொழில் முயற்சிகளைப் பாதுகாத்து, உள்நாட்டுப் பொருளாதாரத்தைக் கட்டியெழுப்ப வேண்டும் என்ற கொள்கையினைக் கொண்டுள்ளோம். கோவிட்-19 தொற்றுநோய் காரணமாக அந்தக் கருத்து மக்கள் மத்தியில் உறுதிப்படுத்தப்பட்டமை எமக்குப் பாரிய துணிச்சலை வழங்குகிறது.

எனவே, இந்த உலக தொழிலாளர் தினத்தன்று கோவிட் தொற்றுநோய்க்கு எதிராகப் போராடுகின்ற சுகாதாரப் பிரிவினர், முப்படையினர், அரச அதிகாரிகள் உட்பட அனைத்துத் துறைகளையும் வேலை செய்யும் மக்கள் கௌரவிக்க வேண்டும். நாம் இவ்வாறான சவால்களைத் துணிச்சலுடனேயே ஏற்றுக்கொள்கிறோம். அதற்கு வேலை செய்யும் மக்களுடன் இணைந்து வேலை செய்து, பெற்றுக்கொண்ட உந்துசக்தி எம்மிடம் உள்ளது. உங்கள் அனைவருக்கும் சௌபாக்கியமான, திடவுறுதி மிகுந்த எதிர்காலம் அமைய வேண்டும் எனப் பிரார்த்திக்கிறேன்.