கொழும்பு பேராயர் கர்தினால் மல்கம் ரஞ்சித் ஆண்டகை தாக்கல் செய்த எழுத்தாணை மனுவை, பரிசீலனைக்கு எடுத்துக்கொள்ள மேன்முறையீட்டு நீதிமன்றம் தீர்மானித்துள்ளது.
பயங்கரவாத தாக்குதல் தொடர்பில் விசாரணை நடத்த நியமிக்கப்பட்ட ஜனாதிபதி ஆணைக்குழுவின் பரிந்துரைகளை, நடைமுறைப்படுத்தக் கோரி இந்த மனுத் தாக்கல் செய்யப்பட்டது.
மேன்முறையீட்டு நீதிமன்ற நீதிபதிகளான சோபித ராஜகருணா மற்றும் தம்மிக்க கணேபொல ஆகியோர் முன்னிலையில், இம்மனு நேற்று திங்கட்கிழமை விசாரணைக்கு வந்தது.
இதன்போது உரிய ஆவணங்களை சமர்ப்பிக்குமாறு சம்பந்தப்பட்ட தரப்பினருக்கு உத்தரவிட்ட நீதிமன்றம், மனுவை மே மாதம் (09) விசாரணைக்கு எடுத்துக்கொள்ளவும் தீர்மானித்தது. பயங்கரவாதத் தாக்குதலைத் தடுக்கத் தவறிய பொலிஸ் அதிகாரிகளுக்கு எதிராக நடவடிக்கை எடுக்குமாறு, ஜனாதிபதி ஆணைக்குழு பரிந்துரைகளை வழங்கியுள்ளதாக மனுதாரர் தெரிவித்துள்ளார்.
பரிந்துரைகள் அமுல்படுத்தப்படவில்லையென சுட்டிக்காட்டிய கர்தினால் மல்கம் ரஞ்சித் ஆண்டகை, அவற்றை நடைமுறைப்படுத்த சட்ட மாஅதிபருக்கு உத்தரவு பிறப்பிக்குமாறும் கோரியுள்ளார்.
